பிரதேச மக்களின் வீடு தேடிச்சென்று சேவை செய்யும் மருத்துவ குழு-முல்லைத்தீவு!

முல்லைத்தீவு நகரில் உள்ள பிரதேச வைத்தியசாலையால் நடமாடும் கிளினிக் சேவை இன்று தொடக்கி வைக்கப்பட்டுள்ளது .

முல்லைத்தீவு பிரதேச வைத்தியசாலையின் வைத்திய அதிகாரி திருமதி நிரோசினி திலீபன் தலைமையில் வைத்தியர் நிரோசா சிரேஸ்ட தாதியர் தர்மராசா சுகிந்தராசா, மருந்தாளர், பணியாளர்கள், வாகன சாரதி ஆகியோர் தங்களது வைத்தியசாலையில் மாதாந்த கிளினிக் பெறுவோருக்கு நடமாடும் சேவை மூலம் ஒவ்வொருவருடைய வீட்டு வாசலுக்கு சென்று பரிசோதித்து அவர்களுக்குரிய மருந்துகளை இன்று(25.03.2020) முதல் வழங்கி வருகின்றனர்.

முல்லைத்தீவு பிரதேச வைத்தியசாலையின் எல்லைக்குட்பட்ட உண்ணாப்புலவு , கள்ளப்பாடு வடக்கு, கள்ளப்பாடு தெற்கு, வண்ணாங்குளம், மணற்குடியிருப்பு, முல்லைத்தீவு நகரம், கரைச்சிகுடியிருப்பு, செல்வபுரம், முள்ளிவாய்க்கால் கிழக்கு ஆகிய கிராமங்களுக்கு இந்த மருத்துவ சேவை வழங்கபடவுள்ளது .

இதன்படி இன்று ( 25.03.2020 ) உண்ணாப்புலவு , கள்ளப்பாடு வடக்கு, கள்ளப்பாடு தெற்கு, ஆகிய கிராமங்களுக்கு சென்று தங்களது மருத்துவ சேவையினை வழங்கியுள்ளனர்.

நாட்டில் COVID 19 தொற்று தடுப்புக்காக ஊரடங்கு சட்டம் பிறப்பிக்கப்பட்டுள்ள இந்த கால கட்டத்தில் வைத்தியசாலைக்கு வர முடியாத நோயாளர்களுக்கு குறித்த வைத்தியசாலையில் கிளினிக்கு வரும் நோயாளர்களுக்கும் சிரமத்தை போக்கும் நோக்கோடு வீடு தேடி சென்று சிகிச்சை வழங்கப்பட்டு வருகின்றமை குறிப்பிட தக்கது